(若大家喜歡我鏡頭下的馬拉松風景,不妨Click樂施會的標誌,資助他們的扶貧工作)

2007年7月3日星期二

剛果民主共和國.全世界最混亂的地方

原本應該繼續《巴勒斯坦篇》,但今天有單新聞,說一名香港遊客掉進剛果民主共和國某火山!剛果民主共和國這些鬼地方,除了救援組織或政府人員外,遊客絕無僅有,竟然還有香港遊客去看火山!不如插播一集剛果,講講這個鬼地方。

我當然沒有到過剛果民主共和國(Congo Democratic Republic),最多也是到訪它的鄰國贊比亞。剛果是前比利時殖民地,1960年6月獨立後不到100天,該國便發生第一次政變;1965年,軍事強人蒙博托(Muboto)又發動政變,並開始長達30年的軍事獨裁統治,並把剛果國名改為札伊爾(Zaire)。

由於蒙博托反共的立場,冷戰期間蒙博托政權獲得美國大量援助,並多次到訪白宮與美國前總統尼克遜及列根等會面,結果令這個貪污腐敗的政權維持30年屹立不倒。冷戰結束,蒙博托再沒有利用價值,他於97年因前列腺癌逝世後,札伊爾隨即陷入內戰,軍閥卡比拉(Kabila)奪權後,把國名回復為剛哥民主共和國。局勢至近幾年才穩定下來,06年終於舉行總統大選。

去年9月底、筆者在贊比亞Livingstone的Jollyboy Hostel,碰到一個法國佬,他剛剛由剛果到贊比亞。一個百無聊賴、風和日麗的中午,聽他講講剛果之行…

「我由剛果黎,呢個地方真係全世界最污糟的地方。你問我有無相睇?我相都冇影,因為實在太污糟,影相都整污糟我部相機。首都金沙薩除左幾間酒店以外,垃圾積到上腳。」

「我原本只係諗住過境,點知一共係剛哥留左二個月! 諗住一入境就上船,十五日船再加火車,應該一個月搞掂。」

「但點知架船中途係河度死火,但一直係個河邊無第二架船黎,十五日的船程,變左五十日留係河邊!咁已經知道大鑊,因為我個簽證得一個月,而家已經超晒時間,但又走唔到。」

「到第五十一日,終於有機會走到,因為船上貨物的貨主好唔耐煩,要搵車黎載走些貨。難得有機會,我就即刻自動請纓,叫佢請埋我做司機幫手駕車,於是終於可以繼續走。」

「但問題就係,旅途會穿越好多危險地帶,如果你坐火車,好難截得停你,但你駕車就好麻煩,你係白人,黑白兩道見到你肯定屈你錢。渣車無耐,已經遇到官截停我,然後話我簽證過期,話過一個月要罰二十萬歐羅!!!最後我同佢講價講左三個鐘,最後變左廿蚊美金!咁我又未驚自己會死,因為呢度的人只想屈你的錢,不會要你的命。」

「落車後要轉火車到Zambia邊境,但火車站職員罷工,根本無火車票賣,淨係得載貨火車,但我真係想盡快離開呢個國家,點都要照上,於是同十幾個當地黑人,畀錢一齊擠上架載貨火車。」

「但架車一停站又出事,無端端有差佬上黎查飛,我地邊度有飛?結果個差佬就話佢無飛,要拉我(其他黑人無錢屈,拉黎無意思),但好彩其他黑人撐我,話要拉就一齊拉,個差佬又真係拉晒佢地,我地坐左一晚監,又屈你錢。」

「呢D類似敲詐無日無之直至邊境!差唔多晚晚係火車度,都有人起身叫你夜尿,至少都要畀一罐啤酒的價錢,先可以打發佢地走。到了邊境唔好以為安全,一樣繼續敲詐你,個入境官又話:我的簽證過期要罰款,明明我都罰左次,我比埋罰單佢睇,但都無用,結果又罰多次錢。」

「但咁都未完,臨尾仲有一鑊,去Zambia要有打黃熱病針的證明,我張針卡明明有效,但個醫生老屈我話,張針卡過期,比錢先可以有效!最後真係嬲得濟,即刻係醫生手上搶返張針卡,然後永遠離開呢個國家。」

若不計非洲政治書藉,這就是我對剛哥民主共和國實況的唯一認知,我不知道這個法國佬說的話有沒有誇張,但我相信雖不中、亦不遠。

有機會去下這些鬼地方也不錯(當然要有命返出黎),至少回來後可以同朋友吹下水,講講這些特別經驗,炫耀自己竟然咁都唔死得,無穿無爛!夠膽去剛哥民主共和國闖盪冒險的旅客值得尊敬,可惜這位鄭小姐,卻於剛果的火山口行人止步了。

9 則留言:

ss_ter 說...

呢d經歷 試一次就夠 不過梗係要有命出返黎 ~!

匿名 說...

唔通個跌落火坑的香港女子就係唔肯俾錢俾人推落火山?我在印尼玩的時候,成膠日有D三唔識七的男男女女走過來同你解釋呢樣文化果樣風情,我份人衰好學孜孜不倦果隻,一聽就上癮,講完一大輪之後佢就會烚熟狗頭咁開聲收錢,好在通常價錢都幾合理,雖則有半屈成份,但係都可以接受.
貧窮國家的老百姓就係靠呃呃騙騙發圍,你去到也門,呃飲呃食就冇你份,你真係要日防夜防,最好的方法,當然係將你的身家交由我們保管喇...鬼腳七

匿名 說...

呢個情況我都遇過,係耶路撒冷古城,無端端會有人,無論係大人定細路,都會走黎好熱心同你解釋苦路有乜有物,好彩早有提防,及早講唔要。

若果唔計賊、綁架...旅行最難搞的三類人,暫時係的士司機第一、邊防人員第二、好熱心的人同路人第三(問路時經常老點你)。

版主

匿名 說...

我贊成的士司機係第一.
我去約旦果陣,有個的士司機好好人咁,當然不斷講解文化風情,重邀請我們到他家參觀,我們一行四人,反正死就死.

去到他家,老婆仔女一堆人出來招呼,特色小吃又茶又酒,重將傳統服裝拿出來給我們試兼且又拍照,我都知道一定要收錢,但同行一名純真友人竟然話這樣係人地的熱情文化,叫我唔好想歪...果然,的士司機車我們回酒店,獅子開大口話要幾百美元之類,真係痴痴地,終於討價還價一大輪,先至願意降價收費,查實他沒甚麼具體付出,不過既然大家開心,就要比d錢人地啦,邊有免費午餐??

但係去過雲南的石林,又真係有一個族(唔記得?族)的家人,將家裡的傳統服裝給我穿去石林參加火把節,無問我拿錢又無人看住我去,家人的媽媽幫我穿好服裝後讓我自行離開,果晚火把節後好多鬼佬捉住我影相,以為我係該族的人,但唔知他們有否留意我腳上是穿著一對nike鞋?

事後我甚至可以唔還套衣服給他們,但我為人正直,梗係唔會這樣做,當我歸還衣服時,我打算給他們一些錢,他們全家老虎蟹死都唔收,重極度生氣...我想,這次我看錯我們的同胞了!

版主,因咩你咁厲害,法國佬同你講的野,可以有咁多direct引述,唔通你有錄音??....馬拉松之花

匿名 說...

To:馬拉松之花

咁奇異的故仔,聽完肯定記得,好彩是去年非洲返港後,已將這段奇談send過給人,所以自己有個底,而家寫實會遺留一點細節。(可惜以前無寫的習慣,有些題目而家寫,都要花時間組織)

若要排各國的士司機仆街程度,我同你一樣,約旦暫時係排第一。細節,留待日後寫的士司機時再詳談。

熱情招待後收錢,我都試過,去年在南非約翰內斯堡的Soweto Township,整個tour就係咁。

遊客好多時都要睇所謂本地文化,但其實睇到的東西、熱情招待,全部都係堆砌出來,真正的本地文化,就係開工搵食,鬼得閒應酬你。

版主

匿名 說...

馬拉蟲之瓜,你的雲南經歷確是匪夷所思,可能你中了回族蠱毒,收了你錢你都唔記得,仲硬膠膠周圍唱...講到呃遊客,我突然想起一宗遊客呃人事件,事緣有條粉皮有一年去尼泊爾旅遊,有條尼泊爾客棧的職員見到條香港粉皮手上的表異常精美,即刻出錢交換,於是粉皮平平地大約一百港元賣了給他,交易完成.查實粉皮手上的表乃是鴨記劣貨,而且開始壞壞地,一手售價也毋須七十港元,條粉皮帶去尼泊爾都係用作裝飾為主,點止有單咁筍的交易,真係時來運到.條粉皮係邊個?之唔係我囉.講真,我又唔係有心呃佢的,不過我驚出價太低會影衰尼泊爾國體,所以就象徵式賺佢三十塊咁囉,呢D野你情我願,好似西門慶同COCO咁,冇話邊個累邊個架.

匿名 說...

我都曾經有機會反賺人錢。記得在約旦Petra古城(剛剛入圍七大奇蹟之一,呢個肯定實室名歸),個城好x大,好多山行,所以帶住行山杖,有個中東老想同我買行山杖,幾多錢都得!

因為中東原來無呢樣野賣(好多人走埋黎,研究我碌行山杖,你不如叫Sherin做代理,包賺),但我就無賣啦,因為隻腳剛剛係死海醫返,擔心再傷過。

結果錯失過賺錢機會囉。

版主

匿名 說...

廿分認同呀! 我也曾在波蘭機場俾個的士師機呃過,嗰程車費貴咗成5倍,好彩佢都車咗我去目的地,如果唔係一個人夜媽媽都唔知點算。

匿名 說...

除了以上提的幾類人,剛醒起一類人,都好值得提防,就係細路仔。我試過比細路扒走左50蚊美金。

的士司機仆街咁多人認同,遲些真要另僻題目,談談旅行碰到路人甲乙丙丁的各類風險。

版主